أن تشهد ثورتين وإطاحةً بحكمين خلال شهر من الزمن، أمر لا يصدّق. ويصعب استيعابه هكذا دفعةً واحدة.
أتصوّر نفسي عجوزاً تجلس على أحد الكراسي الهزازة (كرسي هزّاز؟ لا، كرسي جلد بمجسّات للتدليك)، أحمل نظارةً ثخينة (أو ربما يكون زمن النظارات اندثر)، أحمل كتاباً (أو "آي بوك"، بدأت الكتب الورقية بالتناقص). ويأتي حفيدي (هذا إذا تزوجت)، يسألني :تاتا (أو مي هيك حاف)، خبريني عن ثورات 2011!
أمسك الـ"آي بوك" خاصته، وأتلمّس شاشة ملف كتاب التاريخ..
- حبيبي، منزّل الـVirgin الجديد على آي بوكّك؟
ـ ستّي! Virgin شو؟ هدا الحكي كان زمنك.
ـ حاسة الحكي طالع نازل. هاي صورة زين العابدين ومبارك سوا؟
ـ ستّي، ما عملتي جلسة ليزر الصبح؟ أنا تارك قلم الليزر في الحمّام عشان إزا بتحبّي تستعمليه.
ـ أنا عارفة؟ مش شايفة منيح. انسَ التكنلوجيا، أنا بحكيلك شو صار، أنا شهدتها شخصيّاً.
ـ إيه، بدينا استعراض، شو صار؟
ـ ولك يصحّلك. كنت أدرس ماجستير إعلام حديث في عمّان. لما حرق بو عزيزي حاله في تونس.
ـ لحظة لحظة، مين بو عزيزي؟
ـ الدكتور بو عزيزي إللي الشرطة أخدوا منه بسطة الخضرا، وحرق حاله احتجاجاً.
ـ بس ما إله ذكر في الـ"آي بوك".
ـ مش بقللك الكتابة طالعة نازلة؟! المهم، ثاروا الشعب التونسي على زين العابدين بن علي، وبدهم يغيروا النظام والحكومة والسياسات و..
ـ بس أنا قرأت في الـ"آي بوك" إنه زين العابدين كان مخضّرها لتونس، وهو أول من نادى بعدم البقاء في الحكم طويلاً.
ـ طيّب وبعدين؟ مهو ضل في الحكم 23 سنة.
ـ كملي ستي كملي، مش كاتبين لا 23 ولا غيرها.
ـ حمل حاله هالـ زين العابدين، وفل على فرنسا، ما استقبلوا، مرّ على إيطاليا ما استقبلوا، عبّى سولار وكمّل على السعودية، لولا اتحجج بالعُمرة، كان كمان ما استقبلوه.
ـ بس الـ"آي بوك" ما بقول هيك ستي، زين العابدين بعد ما ثاروا الشعب، قال إنه بحب شعبه وسلّم الحكم لـ الغنوشي، وقال إنه بحترم مطالب الشعب، وفعلاً راح على السعودية يعمل عُمرة تكفيراً.
ـ مكتوب إنه زوجته حملت طن ذهب؟
ـ لأ
ـ مكتوب إنه هرّب مليارات من اليورو؟
ـ شو اليورو ستي؟
ـ زي ما تقول الدينار العربي المشترك إللي بتقاتلوا وين يكون البنك المركزي تاعه، في أي دولة من الـ 30 دولة عربية.
ـ 31 ستي، شو نسيتي إنه البحرين قسموها لجزيرتين في المشروع الأخير؟ سمّوا وحدة بحرين والتانية جزيرتين.
ـ آه صح، نسيت. العتب عل كبر يا ستي.
ـ ما عملتي Back Up للـMemory Card إللي في راسك؟
ـ لأ يا حبيبي، بعطيك ياها بس نخلّص شرح.
ـ آه صح، كملي يا ستي.
ـ فش كم من يوم، بدوا هالمصريين يثوروا، اتجمعوا في ميدان التحرير، شي مليون واحد.
ـ هدول كانوا في مصر الضفة الشرقية لنهر النيل أو الضفة الغربية لنهر النيل؟
ـ كانت دولة وحدة، جمهورية مصر العربية. بعدين معك؟ كم مرّة صرت قاطعني؟ يعني مش مكتوب هالحكي في "آي بوكّك"؟
ـلأ والله. مكتوب اجتمع كم من ألف في ميدان الشهداء مش التحرير، مطالبين بالعدالة الاجتماعية، وتوفير البسكوت، وتوزيع الحشيش..
ـ أخرس! مين قال هيك؟
ـ الـ"آي بوك" يا ستي، والله الـ"آي بوك".
ـ كذب. صمد هالعرص المبارك، شي 18 يوم. قريب الـ500 شهيد، وألفات الجرحى.
ـ بس بقولوا في الـ"آي بوك" إنه بعد قرابة العشر أيام، واستيعابه للثورة السلمية، ورغبة منه بتحقيق المطالب، فوّض عمر سليمان باستلام الحكم، وهو مسكين حمل أغراضه وراح على شرم الشيخ يشتّي هناك.
ـ كزب يا ستي، 18 يوم بالتمام والكمال، وبعد ما فقّع الشعب، بدو يروح وما بدّه، لازق بالكرسي وما بدّه، بخطب بالعالم وما بدّه. طلع عمر سليمان إللي بتحكي عنه، وأعلن إنه مبارك تنحّى بعد ما تنّح، وسلّم الأمور للجيش، وراح..
ـ على شرم الشيخ يشتّي.
ـ طيّب بدنا نفرض إنه راح على شرم الشيخ يشتّي.
ـ طيب.. الجزائر شو صار فيها؟
ـ ....
ـ اليمن؟
ـ .....
ـ العراق؟
ـ ....
ـ ليش مش عم تحكي؟ ستي؟
ـ بعد هيك يا ستي، مش عم بتذكّر منيح.
ـ هاتي الـMemory Card  أزبطلك الوضع.
ـ لحظة. أي وضع؟ لأ لأ لأ .. خليني على ذاكرتي الحقيقية لتقوم تنزّلّي Virus يمحي أحلى ذكريات 2011، وتنزّلي برنامج معفّن من نسخة الـ"آي بوك" تاعك. دخلك مين كاتب هدا الـ Virgin؟
ـ مكتبة الشرق الأوسط الجديد.
ـ آآآآه قلتللي.
ـ ليش ستي؟
ـ ولا شي. أنت ما خلّصت امتحانات التوجيهي؟ همة لسّا ما لغوا هالنظام المعفن؟
ـ احتمال، احتمال هاه، السنة الجاي يلتغي. احتمال.
ـ طيّب، بما أنك زكّرتني بـ2011، تروح معي الليلة رحلة هناك؟
ـ المشكلة إنه عليّ امتحانات، وآلة الزمن آخر مرّة فلمتنا، شو نسيتي؟ رحنا على 2020، وما لقينا فلسطينيين في القدس وانسم بدنك.
ـ ما تذكرني. فكرك مفتاح البيت المعلق برقبتي بلاقي له باب في وادي الجوز؟
ـ لو قلتيلي بطاقة ممغنطة كان قلتلك ممكن.